बुलढाणा : उद्धव ठाकरे मुख्यमंत्री असताना त्यांनी दिलेला शब्द पाळत कोणत्याही कागदपत्रांच्या अडचणींशिवाय शेतकऱ्यांना थेट कर्जमाफीचा लाभ मिळाला होता. मात्र, विद्यमान सरकार कर्जमाफी देताना शेतकऱ्यांमध्ये दुजाभाव करत असून, त्यातच बँकांकडून तांत्रिक अडचणींचे कारण पुढे करून शेतकऱ्यांना त्रास दिला जात आहे, असा आरोप शिवसेना (उद्धव बाळासाहेब ठाकरे) बुलढाणा तालुकाप्रमुख विजय इतवारे यांनी केला.
पाडळी येथील सेंट्रल बँक शाखेच्या व्यवस्थापकांची भेट घेऊन इतवारे यांनी शेतकऱ्यांच्या बँक खात्यांशी संबंधित KYC, फार्मर आयडी लिंकिंग तसेच इतर तांत्रिक अडचणी तातडीने दूर करण्याची मागणी केली. नुकतीच जाहीर झालेल्या पुण्यश्लोक अहिल्यादेवी होळकर शेतकरी कर्जमुक्ती योजनेच्या पार्श्वभूमीवर पाडळी शाखेअंतर्गत कर्जमाफीस पात्र ठरलेल्या शेतकऱ्यांची यादीही त्यांनी मागितली. तसेच कोणते शेतकरी कर्जमाफीपासून वंचित राहिले आहेत, याची माहिती घेण्याची मागणी केली.
अनेक शेतकऱ्यांना KYC अपूर्ण असणे, फार्मर आयडी लिंक नसणे यासह विविध तांत्रिक अडचणींचा सामना करावा लागत आहे. या अडचणींमुळे पात्र शेतकरी कर्जमाफीच्या लाभापासून वंचित राहू नयेत, यासाठी बँक प्रशासनाने तातडीने उपाययोजना कराव्यात, अशी आग्रही मागणी विजय इतवारे यांनी केली.
यावेळी शिवसेना (उद्धव बाळासाहेब ठाकरे) किसान सेना उपतालुकाप्रमुख रवींद्र पवार, शाखाप्रमुख शालिग्राम सोनोने, अरुण डुकरे, लक्ष्मणराव वसु, रामदास मुळे, विलास पवार, जिलानी बेग इसा बेग, दीपक मुळे, शांतिनाथ अपार, शरद गायकवाड यांच्यासह शेतकरी बांधव उपस्थित होते.
‘शांतीत क्रांती’ करणाऱ्या बुधवतांची राजकीय पकड पुन्हा अधोरेखित
संमतीशिवाय कर्ज पुनर्गठन करून शेतकऱ्यांना कर्जमाफीपासून वंचित ठेवल्याचा आरोप
