देऊळगाव राजा : देऊळगाव राजा नगरपरिषदेतील सेवानिवृत्त कर्मचाऱ्यांना निवृत्तीनंतरचे आर्थिक लाभ मिळत नसल्याच्या निषेधार्थ आमरण उपोषणाला बसलेल्या दोन सेवानिवृत्त कर्मचाऱ्यांनी आमदार मनोज कायंदे यांच्या आश्वासनानंतर उपोषण मागे घेतले. बी. एम. भगत आणि रा. ब. गोरे यांनी १५ ऑगस्टपासून नगरपरिषदेसमोर उपोषण सुरू केले होते. नगरपरिषदेच्या आस्थापनेवर नियुक्त झालेल्या कर्मचाऱ्यांना नियत वयोमानानुसार सेवानिवृत्त झाल्यानंतर उपदान (ग्रॅच्युइटी) तसेच रजा रोखीकरणाची रक्कम देणे ही नगरपरिषद प्रशासनाची जबाबदारी आहे. मात्र आर्थिक अडचणींचे कारण पुढे करत अनेक सेवानिवृत्त कर्मचाऱ्यांना अद्याप हे लाभ मिळाले नसल्याचा आरोप करण्यात आला आहे.
उपोषणाची नगरपरिषद अध्यक्ष माधुरी शिपणे यांनी दखल घेत आमदार मनोज कायंदे यांना याबाबत माहिती दिली. त्यानंतर आमदार कायंदे यांनी संबंधित यंत्रणेला शासनाकडून निधी उपलब्ध करून घेण्यासाठी प्रस्ताव तयार करून सादर करण्याच्या सूचना दिल्या. अध्यक्षांनी लेखी आश्वासन दिल्यानंतर भगत आणि गोरे यांनी उपोषण मागे घेतले.
दरम्यान, शासनाच्या नगरविकास विभागाने ९ जून २०१६ रोजीच्या आदेशानुसार नगरपरिषदांना मिळणाऱ्या विविध अनुदानांपैकी तसेच मुद्रांक शुल्क, गौण खनिज, बिगरशेती सारा, करमणूक कर आणि घरपट्टीच्या वसुलीतील २० टक्के रक्कम सेवानिवृत्त कर्मचाऱ्यांच्या थकीत रकमा अदा करण्यासाठी वापरण्याचे निर्देश दिले असल्याचे सांगण्यात आले. तसेच ३१ मे २००२ रोजीच्या स्थायी निर्देशानुसार उपदानाची रक्कम देय झाल्यापासून तीन महिन्यांनंतरही प्रशासकीय कारणामुळे रक्कम अदा न झाल्यास, संबंधित कर्मचाऱ्याला तीन महिन्यांनंतरच्या कालावधीसाठी व्याज देण्याची तरतूद असल्याचा दावा करण्यात आला. मात्र, या निर्देशांनंतरही अनेक कर्मचाऱ्यांना मूळ उपदानाची रक्कमच मिळाली नसल्याने नाराजी व्यक्त करण्यात आली.
उपदानाची रक्कम आणि रजा रोखीकरणाची थकीत रक्कम व्याजासह मिळावी, या मागणीसाठी हे उपोषण करण्यात आले होते. नगरपरिषद अध्यक्ष माधुरी शिपणे, माजी नगराध्यक्ष संतोष खांडेभराड यांच्या पुढाकाराने आणि आमदार मनोज कायंदे यांच्या सहकार्याने उपोषणाची सांगता झाली. यावेळी संतोष खांडेभराड, धनशिराम शिपणे, प्रदीप वाघ, गोविंद तिडके, शौकत भाई, दिलीप झोटे, सुनील शेजुळकर, आदर्श गुप्ता, तुषार शिपणे यांच्यासह अन्य उपस्थित होते.
खामगाव-शेगाव पालखी सोहळ्यासाठी वाहतुकीत मोठे बदल; पर्यायी मार्गाने वाहतूक वळविली
प्रवीण बागडे यांना ‘लोकशाहीर अण्णाभाऊ साठे साहित्यरत्न’ राज्यस्तरीय पुरस्कार जाहीर
