अज्ञातांकडून रात्रीच्या सुमारास नुकसान; सीसीटीव्ही बंद असल्याने तपासात अडथळा
मलकापूर, प्रतिनिधी : मलकापूर बसस्थानकाच्या आवारात उभ्या असलेल्या चार ते पाच एसटी बसची अज्ञात व्यक्तींनी तोडफोड केल्याची घटना समोर आली आहे. ही घटना १७ ऑगस्टच्या रात्रीच्या सुमारास घडल्याची माहिती आहे. अज्ञात व्यक्तींनी बसस्थानक परिसरातील बसचे नुकसान केले. सकाळी हा प्रकार निदर्शनास आल्यानंतर परिसरात खळबळ उडाली. घटनेची माहिती मिळताच मलकापूर पोलिसांनी तपास सुरू केला आहे.
दरम्यान, बसस्थानक आवारातील सीसीटीव्ही कॅमेरे बंद अवस्थेत असल्याने पोलिसांच्या तपासासमोर मोठे आव्हान निर्माण झाले आहे. सीसीटीव्ही फुटेज उपलब्ध नसल्यामुळे तोडफोड करणाऱ्या अज्ञात व्यक्तींचा शोध घेण्यात अडचणी येत आहेत.
बसस्थानकासारख्या महत्त्वाच्या सार्वजनिक ठिकाणी सीसीटीव्ही यंत्रणा बंद असणे ही गंभीर बाब असून, संबंधित प्रशासनाने याकडे तातडीने लक्ष देण्याची गरज व्यक्त होत आहे. पोलिसांकडून उपलब्ध माहितीच्या आधारे आरोपींचा शोध घेण्याचे प्रयत्न सुरू आहेत.
संतनगरी सज्ज : श्री संत गजानन महाराजांच्या पालखीचे बुधवारी शेगावात आगमन
