बुलढाणा (प्रतिनिधी): शहरातील राधेय हॉटेलमध्ये सुरू असलेल्या सह्याद्री हॉस्पिटलमधून दोन वेळा विद्युत साहित्य चोरीला गेल्यानंतर त्याच हॉटेलमधील एका ग्राहकाचा आयपॅड आणि कारची चावीही चोरीला गेल्याची घटना समोर आली आहे. या तिन्ही घटनांमध्ये एकूण २ लाख ९० हजार रुपयांचा मुद्देमाल चोरीला गेल्याप्रकरणी बुलढाणा शहर पोलीस ठाण्यात गुन्हा दाखल करण्यात आला आहे.
फिर्यादी विक्रम एकनाथ म्हस्के (वय ५९, शांती निकेतन नगर, बुलढाणा) यांनी दिलेल्या तक्रारीनुसार, त्यांच्या सुनेच्या सह्याद्री हॉस्पिटलसाठी राधेय हॉटेलमधील काही जागा भाडेतत्त्वावर घेण्यात आली असून तेथे रुग्णालयाचे काम सुरू आहे.
२६ जुलैच्या रात्री हॉस्पिटलच्या विद्युत फिटिंगसाठी आणून ठेवलेले ३९ वायर बंडल, तांब्याचे साहित्य आणि इतर इलेक्ट्रिकल साहित्य, असा सुमारे ६५ हजार रुपयांचा ऐवज चोरीला गेला. त्यानंतर ३० जुलैच्या रात्री फिटिंग केलेले २४ वायर बंडल आणि उर्वरित चार वायर बंडल, असा सुमारे ५५ हजार रुपयांचा आणखी मुद्देमाल लंपास करण्यात आला. सलग चोरीच्या घटनांनंतर हॉस्पिटल परिसरात सीसीटीव्ही कॅमेरे बसविण्यात आले. २ ऑगस्ट रोजी सकाळी फुटेज तपासताना पहाटे ४.५० वाजण्याच्या सुमारास एक व्यक्ती बॅग घेऊन बाहेर जाताना दिसल्याचे निदर्शनास आले. फिर्यादीनुसार, हॉटेल व्यवस्थापक अमर किशोर काटकर यांनी सीसीटीव्हीतील व्यक्तीची ओळख हॉटेलच्या रूम क्रमांक १०८ मध्ये वास्तव्यास असलेल्या अभिजित ऊर्फ गणेश राजेश किम अशी केल्याचे नमूद केले आहे.
दरम्यान, हॉटेलच्या रूम क्रमांक २२० मध्ये वास्तव्यास असलेले धीरज टेकाळे यांनी त्यांच्या खोलीतून सुमारे १ लाख ७० हजार रुपयांचा आयपॅड आणि कारची चावी चोरीला गेल्याची माहिती दिली. सीसीटीव्ही फुटेजमध्ये दिसणारी बॅग स्वतःची असल्याचेही त्यांनी पोलिसांना सांगितल्याचा उल्लेख फिर्यादीत करण्यात आला आहे.
सीसीटीव्ही फुटेजच्या आधारे संशयिताची ओळख पटल्याचा दावा फिर्यादीने केला असून, त्याच्याविरुद्ध बुलढाणा शहर पोलीस ठाण्यात गुन्हा दाखल करण्यात आला आहे. पोलीस या प्रकरणाचा पुढील तपास करत आहेत.
देवीचे दर्शन घेऊनच फोडला गाभारा; मर्दडी देवस्थानातून ९ लाखांच्या दागिन्यांची धाडसी चोरी
हर्षवर्धन सपकाळ यांच्या वक्तव्याविरोधात राष्ट्रवादी युवक व विद्यार्थी काँग्रेसचे ‘जोडे मारो’ आंदोलन
