चिखली / प्रतिनिधी
दिल्लीतील जंतर-मंतर येथे शांततापूर्ण आंदोलन करणाऱ्या विद्यार्थ्यांवर झालेल्या लाठीचार्जच्या निषेधार्थ तसेच लोकसभेचे विरोधी पक्षनेते राहुल गांधी यांच्याशी पोलिसांनी कथित गैरवर्तन केल्याच्या निषेधार्थ चिखली शहर व तालुका काँग्रेस कमिटीच्या वतीने गुरुवार, २३ जुलै रोजी छत्रपती शिवाजी महाराज चौकात आक्रमक आंदोलन करण्यात आले. लोकनेते राहुल भाऊ बोंद्रे यांच्या मार्गदर्शनाखाली झालेल्या या आंदोलनात केंद्र सरकारविरोधात जोरदार घोषणाबाजी करण्यात आली.
आंदोलनादरम्यान काँग्रेस पदाधिकारी व कार्यकर्त्यांनी विद्यार्थ्यांवरील लाठीचार्जचा तीव्र निषेध नोंदवत, लोकशाही मार्गाने आंदोलन करण्याचा घटनात्मक अधिकार हिरावून घेण्याचा प्रयत्न होत असल्याचा आरोप केला. “विद्यार्थ्यांचा आवाज दडपणारे सरकार हाय हाय”, “लोकशाहीचा गळा घोटणाऱ्या सत्तेचा निषेध असो”, “विद्यार्थ्यांवरील अत्याचार बंद करा” अशा घोषणांनी परिसर दणाणून गेला.
यावेळी वक्त्यांनी केंद्र सरकारवर लोकशाही मूल्यांची पायमल्ली केल्याचा आरोप करत विद्यार्थ्यांच्या प्रश्नांकडे लक्ष देण्याऐवजी त्यांच्यावर बळाचा वापर करणे असंवैधानिक असल्याची टीका केली. विद्यार्थ्यांवरील कारवाईची उच्चस्तरीय चौकशी करून दोषींवर कठोर कारवाई करावी, अशी मागणीही करण्यात आली. तसेच विद्यार्थ्यांच्या हक्कांच्या संरक्षणासाठी काँग्रेसचा संघर्ष अधिक तीव्र करण्यात येईल, असा इशाराही आंदोलनकर्त्यांनी दिला. आगामी काळात “लोकशाहीचा गळा घोटणारे मोदी सरकार उलथून टाकू”, असा निर्धारही यावेळी व्यक्त करण्यात आला.
या आंदोलनात नगर परिषद विरोधी पक्षनेते डॉ. मोहम्मद इसरार, बाजार समितीचे सभापती समाधान सुपेकर, प्रशांत भटकर, उबेद अली खान, खलील बागवान, सचिन शेटे, दत्ता करवंदे, रोहन पाटील, पवन गवारे, गजानन डुकरे, शिवनारायण म्हस्के, प्रदीप अंभोरे, युवक काँग्रेसचे शहराध्यक्ष जाकीर शेख, किसान काँग्रेसचे समाधान आकळ, प्रदीप पचेरवाल, शिवराज पाटील, नगरसेवक गोपाल देव्हडे, गोकुळ शिगणे, डॉ. अमोल लहाने, रत्नदीप शिनगारे, संतोष देशमुख, आनंद बोंद्रे, नजिरसेठ कुरेशी, सिद्धेश्वर परिहार, गणेश जवंजाळ, डॉ. रविंद्र कमळस्कर यांच्यासह मोठ्या संख्येने काँग्रेस पदाधिकारी, कार्यकर्ते व नागरिक सहभागी झाले. तसेच कु. तन्वी सचिन शेटे, कु. गायत्री राजेश देशमुख यांच्यासह अनेक विद्यार्थ्यांनी आंदोलनात सहभाग नोंदविला.
राहुल गांधी इंडिया आघाडीच्या खासदारांसह गांधी स्मृती स्थळावर
