प्लास्टिकमुक्त राजूर घाट उपक्रम; पर्यावरण मित्र मंडळाचा स्तुत्य पुढाकार
बुलढाणा – पर्यावरण संवर्धनाचा संदेश देत पर्यावरण मित्र मंडळाच्या वतीने राजूर घाट येथे ‘प्लास्टिकमुक्त राजूर घाट’ हा स्वच्छता उपक्रम राबविण्यात आला. घाट परिसरात विखुरलेल्या प्लास्टिकच्या बाटल्या, चिप्सची पाकिटे आणि इतर प्लास्टिक कचरा गोळा करून परिसर स्वच्छ करण्यात आला.
बुलढाणा जिल्ह्यातील राजूर घाट आपल्या मनमोहक आणि अलौकिक नैसर्गिक सौंदर्यासाठी ओळखला जातो. सकाळी आणि सायंकाळी अनेक निसर्गप्रेमी व पर्यटक या घाटाला भेट देतात. मात्र, काही निष्काळजी नागरिकांकडून फेकल्या जाणाऱ्या प्लास्टिकच्या बाटल्या व खाद्यपदार्थांच्या पाकिटांमुळे घाटाचे नैसर्गिक सौंदर्य मलिन होत आहे. ही बाब लक्षात घेऊन पर्यावरण मित्र मंडळाने स्वच्छता मोहीम राबवत प्लास्टिक कचरा संकलित केला आणि पर्यावरण संरक्षणाचा संदेश दिला.
यावेळी नागरिकांनी पर्यटनस्थळांवर प्लास्टिकचा वापर टाळावा, कचरा कचरापेटीतच टाकावा आणि निसर्गसंपदा जपण्यासाठी प्रत्येकाने आपली जबाबदारी पार पाडावी, असे आवाहनही मंडळाच्या सदस्यांनी केले.
या उपक्रमात पर्यावरण मित्र मंडळाच्या कल्पना माने, प्रदीप डांगे, डॉ. विधी राठी, प्रा. सुरेश जमधाडे, शुभांगी भोंडे, अनिता कापरे, सार्थक डांगे आणि संस्कृती भोंडे यांनी सक्रिय सहभाग नोंदविला. पर्यावरण संरक्षणासाठी राबविण्यात आलेल्या या उपक्रमाचे परिसरातील नागरिकांकडून कौतुक करण्यात आले.
राज्यभरातील लाखो प्रवाशांवर अतिरिक्त आर्थिक भार एसटी प्रवास महागला; १३.५६ टक्के भाडेवाढीला मंजुरी
७२ वे राष्ट्रीय चित्रपट पुरस्कार जाहीर; ‘मुक्काम पोस्ट बोंबिलवाडी’ सर्वोत्कृष्ट मराठी चित्रपट
