अमरावती / जिमाका
जिल्ह्यात ‘पुण्यश्लोक अहिल्यादेवी होळकर शेतकरी कर्जमुक्ती योजने’अंतर्गत दोन टप्प्यांत ८६ हजार ४४७ शेतकऱ्यांना कर्जमाफी जाहीर झाली आहे. मात्र, मयत शेतकरी तसेच अन्य तांत्रिक कारणांमुळे सुमारे १८ हजार शेतकऱ्यांची केवायसी प्रक्रिया प्रलंबित आहे. ही प्रक्रिया एका महिन्यात पूर्ण करून पात्र शेतकऱ्यांना कर्जमाफीचा लाभ मिळवून द्यावा, तसेच त्यांना नव्याने पीक कर्ज उपलब्ध करून द्यावे, असे निर्देश महसूल मंत्री तथा पालकमंत्री चंद्रशेखर बावनकुळे यांनी प्रशासनाला दिले.
नियोजन भवनात पालकमंत्री बावनकुळे यांच्या अध्यक्षतेखाली कर्जमाफी, पीक कर्ज आणि महावितरणच्या कामकाजाचा आढावा घेण्यासाठी बैठक झाली. यावेळी त्यांनी विधानसभा मतदारसंघनिहाय केवायसी प्रलंबित शेतकऱ्यांच्या याद्या तयार करून तलाठ्यांमार्फत संबंधितांना नोटिसा देण्याच्या सूचना केल्या. स्थानिक आमदारांनी या प्रक्रियेत स्वतः लक्ष घालून प्रशासन आणि लोकप्रतिनिधींमध्ये समन्वय साधत महिनाभरात प्रकरणे निकाली काढावीत, असेही त्यांनी सांगितले.
मयत शेतकऱ्यांच्या वारसांना कर्जमाफीचा लाभ देण्यासाठी तहसीलदारांकडून देण्यात येणारे वारसदार प्रमाणपत्र ग्राह्य धरून बँकांनी तातडीने कार्यवाही करावी. या कामात कोणतीही दिरंगाई किंवा कुचराई होऊ नये. संबंधित बँकांनी विलंब केल्यास जिल्हाधिकाऱ्यांनी आवश्यक ती कायदेशीर कारवाई करावी, असे निर्देशही बावनकुळे यांनी दिले.
अखंडित वीजपुरवठ्यासाठी यंत्रणा सुधारा
जिल्ह्यात शेती तसेच सार्वजनिक वापरासाठी वीजपुरवठा वारंवार खंडित होत असल्याच्या तक्रारींची दखल घेत महावितरणच्या अधिकाऱ्यांना तातडीने यंत्रणेत सुधारणा करण्याच्या सूचना देण्यात आल्या. ज्या ठिकाणी नवीन विद्युत रोहित्रांची आवश्यकता आहे, तेथे ती उभारण्यात यावी. त्यासाठी आवश्यक जागा उपलब्ध करून देण्यात येईल, असे बावनकुळे यांनी सांगितले.
जलसंधारणावर भर देण्याचे निर्देश
यंदा पावसाचे प्रमाण कमी राहिल्याच्या पार्श्वभूमीवर जिल्ह्यात मोठ्या प्रमाणात जलसंधारणाची कामे हाती घेण्याच्या सूचना पालकमंत्र्यांनी दिल्या. मालगुजारी काळात गावोगावी बांधण्यात आलेल्या विहिरी पुनर्जीवित करण्यासाठी प्रशासकीय यंत्रणांनी आपल्या कार्यक्षेत्रातील ठिकाणांची यादी तयार करावी. सिमेंट रस्त्यांपेक्षा जलसंधारणाच्या कामांना प्राधान्य देत भूजल पातळी वाढविण्यासाठी सामूहिक प्रयत्न करावेत, असे त्यांनी स्पष्ट केले.
दूरदृश्य प्रणालीद्वारे जिल्ह्यातील तहसीलदारांशी संवाद साधून त्यांनी स्थानिक पातळीवरील विविध प्रश्नांची माहिती घेतली.
यावेळी अमरावती ग्रामीण पोलिसांच्या ‘नशामुक्त अभियानां’तर्गत तयार करण्यात आलेल्या डॉक्युमेंटरीचे पालकमंत्री बावनकुळे यांच्या हस्ते लोकार्पण करण्यात आले.
बैठकीस खासदार बळवंत वानखडे, आमदार प्रवीण तायडे, केवलराम काळे, राजेश वानखडे, प्रतापदादा अडसड, प्रवीण पोटे, संजय खोडके, सुलभा खोडके, उमेश यावलकर, विभागीय आयुक्त नयना गुंडे, जिल्हाधिकारी आशिष येरेकर, मुख्य कार्यकारी अधिकारी सत्यम गांधी, पोलीस अधीक्षक निकेतन कदम, मनपा आयुक्त डॉ. मंगेश गोंदावले यांच्यासह संबंधित अधिकारी उपस्थित होते.
