पंढरपूर : बहुजन साहित्य संघ, चिखली, जि. बुलढाणा यांच्या वतीने आयोजित ७ व्या बहुजन साहित्य संमेलन–२०२६,पंढरपूर येथे आयोजित करण्यात आले यावेळी देऊळगाव मही, जि. बुलढाणा येथील सामाजिक कार्यकर्ते मा. अरुण सखाराम इंगळे यांना सामाजिक क्षेत्रातील उल्लेखनीय योगदानाबद्दल राज्यस्तरीय ‘फुले-शाहू-आंबेडकर पुरस्कार’ प्रदान करून गौरविण्यात आले.
राजर्षी छत्रपती शाहू महाराज साहित्य नगरी, पद्मनाभ पॅलेस सभागृह, सिंघण नगर, पंढरपूर, जि. सोलापूर येथे आयोजित या कार्यक्रमास मा.ऍड., डॉ. विजयकुमार कस्तुरे (अध्यक्ष),ब. सा. संघ मा.नागेशजी सिंघन (संमेलन अध्यक्ष), डॉ. लक्ष्मणराव ढोबळे माजी मंत्री. डॉ. बबनराव महामुने, प्रा. शालिनी काटोले , डॉ. डी. व्ही. खरात (सचिव) तसेच सुधाकर जाधव,यांची प्रमुख उपस्थिती होती. या मान्यवरांच्या उपस्थितीत अरुण सखाराम इंगळे यांना पुरस्कार प्रदान करण्यात आला.
खडकपूर्णा प्रकल्पांतर्गत जवळपास २५ गावांतील शेतकरी व कष्टकरी बांधवांना सिंचन लाभक्षेत्र, धरणग्रस्त प्रमाणपत्र, लाभक्षेत्राचे प्रमाणपत्र, जमीनविषयक हक्क व कागदपत्रे तसेच अधिग्रहित जमिनीबाबत सखोल माहिती देऊन त्यांनी अनेक वर्षांपासून मार्गदर्शन केले आहे. शेतकरी व कष्टकरी यांना त्यांच्या हक्कांची तसेच उपलब्ध शासकीय योजनांची व सुविधांची माहिती करून देण्याचे महत्त्वपूर्ण कार्य त्यांनी केले आहे.
यासोबतच ग्रामीण भागातील आर्थिकदृष्ट्या दुर्बल विद्यार्थ्यांच्या शिक्षणासाठीही त्यांनी उल्लेखनीय कार्य केले आहे. शहरात जाऊन शिक्षण घेणे आर्थिकदृष्ट्या शक्य नसलेल्या विद्यार्थ्यांसाठी त्यांनी आपल्या अर्धांगिनीच्या सहकार्याने विशेष शिकवणी वर्गाच्या माध्यमातून उच्च दर्जाचे शिक्षण उपलब्ध करून दिले. विविध समाजघटकांतील विद्यार्थ्यांना शिक्षणासोबतच दैनंदिन व्यवहारात आवश्यक असलेले मराठी भाषेचे ज्ञान व व्यवहारकौशल्य मिळावे, यासाठीही त्यांनी विशेष प्रयत्न केले.
अनेक वर्षांपासून सुरू असलेल्या या शैक्षणिक व सामाजिक कार्यातून त्यांच्या मार्गदर्शनाखाली अनेक डॉक्टर, इंजिनिअर, वर्ग-१ अधिकारी तसेच उद्योजक घडले आहेत. ग्रामीण व आर्थिकदृष्ट्या दुर्बल घटकांतील विद्यार्थ्यांना शिक्षणाच्या मुख्य प्रवाहात आणण्याबरोबरच शेतकरी-कष्टकऱ्यांना त्यांच्या हक्कांबाबत जागरूक करण्याच्या कार्याची दखल घेत त्यांना हा सन्मान देण्यात आला.
महात्मा फुले, राजर्षी छत्रपती शाहू महाराज आणि डॉ. बाबासाहेब आंबेडकर यांच्या सामाजिक समता, शिक्षण आणि वंचित घटकांच्या उत्थानाच्या विचारांना पुढे नेणाऱ्या त्यांच्या कार्याची दखल घेत हा राज्यस्तरीय पुरस्कार प्रदान करण्यात आला. त्यांच्या सामाजिक व शैक्षणिक कार्याबद्दल व पुरस्काराबद्दल सर्व स्तरांतून त्यांचे अभिनंदन होत आहे.
गणेशोत्सव मंडळांसाठी मोठी संधी; राज्य, राष्ट्रीय अन् आंतरराष्ट्रीय स्तरावर होणार स्पर्धा
FD आणि ITR नियमांमध्ये मोठे बदल; जाणून घ्या नवीन नियमांचा तुमच्यावर काय परिणाम होणार?
