शिक्षकांच्या अडचणींचा विचार करून परीक्षा नियोजनाबाबत स्पष्टता द्यावी- सुभाष मोरे, कार्याध्यक्ष, शिक्षक भारती
बुलढाणा : एकीकडे शाळेतील अध्यापनाची जबाबदारी आणि दुसरीकडे शिक्षक पात्रता परीक्षा (टीईटी) देण्यासाठी करावा लागणारा अभ्यास, अशा दुहेरी कात्रीत शिक्षक अडकले आहेत. टीईटी परीक्षेच्या तारखांमध्ये बदल करण्यात आल्याने शिक्षकांमध्ये नाराजी व्यक्त होत आहे. शासनाने शिक्षकांच्या अडचणींचा विचार करून परीक्षा नियोजनाबाबत स्पष्टता द्यावी, अशी मागणी शिक्षक भारतीचे कार्याध्यक्ष सुभाष मोरे यांनी केली आहे.
शिक्षकांना नियमित अध्यापनासोबतच विविध शैक्षणिक व प्रशासकीय कामांची जबाबदारी पार पाडावी लागते. त्यातच टीईटी परीक्षेची तयारी करण्यासाठी वेळ देणे कठीण होत असल्याचे शिक्षकांचे म्हणणे आहे. परीक्षा पुढे ढकलण्याच्या निर्णयामुळे शिक्षकांच्या अभ्यासाचे नियोजनही विस्कळीत झाले आहे.
याबाबत सुभाष मोरे यांनी सरकारच्या कार्यपद्धतीवर प्रश्नचिन्ह उपस्थित केले. “एकीकडे शाळा आणि दुसरीकडे टीईटीचा अभ्यास, सरकार शिक्षकांची आणखी किती परीक्षा पाहणार?” असा सवाल त्यांनी केला. शिक्षकांच्या मानसिक तणावाचा आणि त्यांच्या व्यावसायिक जबाबदाऱ्यांचा विचार करून परीक्षांचे नियोजन करणे आवश्यक असल्याचे त्यांनी सांगितले.
दरम्यान, टीईटी परीक्षेची सुधारित तारीख स्वतंत्रपणे जाहीर करण्यात येणार असल्याची माहिती देण्यात आली आहे. त्यामुळे आता सुधारित तारीख कधी जाहीर होते आणि शिक्षकांना तयारीसाठी पुरेसा अवधी मिळतो का, याकडे शिक्षकांचे लक्ष लागले आहे.
टीईटीसंदर्भातील पुढील निर्णय शासनाने तातडीने स्पष्ट करावा, तसेच शिक्षकांना अभ्यासासाठी योग्य वेळ आणि नियोजनाची संधी द्यावी, अशी मागणी शिक्षक भारतीकडून करण्यात आली आहे.
बीडच्या शिरपेचात मानाचा तुरा; मुख्याध्यापिका कविता गित्ते यांना राष्ट्रीय शिक्षक पुरस्कार जाहीर
कर्जमाफीच्या मागण्यांसाठी तुपकरांचा सरकारला इशारा; २७ ऑगस्टला मुंबईत आंदोलन
नांदुर्‍यात राष्ट्रवादी काँग्रेसच्या जिल्हा उपाध्यक्षांची कार पेटवली
