बुलढाणा : शहरातील रस्त्यांवर पडलेल्या मोठमोठ्या खड्ड्यांमुळे नागरिक त्रस्त झाले असून, “रस्त्यावरून जातोय की खड्ड्यांमधून?” असा संतप्त सवाल बुलढाणेकरांकडून उपस्थित केला जात आहे. शहरातील अनेक प्रमुख रस्त्यांची अवस्था पावसाळ्यात अधिकच बिकट झाली असून, वाहनधारकांना जीव मुठीत घेऊन प्रवास करावा लागत आहे.
शहरातील काही ठिकाणी खड्डे इतके मोठे झाले आहेत की, वाहनचालकांना अचानक ब्रेक लावावे लागतात किंवा खड्डा चुकविण्यासाठी वाहन दुसऱ्या दिशेने वळवावे लागते. त्यामुळे अपघाताचा धोका वाढला आहे. विशेषतः दुचाकीस्वार आणि ज्येष्ठ नागरिकांना याचा मोठा त्रास सहन करावा लागत आहे. “कर भरतो, रस्त्यावरून प्रवास करतो; मग सुरक्षित रस्ता मिळणे हा आमचा अधिकार नाही का?” असा सवाल नागरिक करत आहेत. सोशल मीडियावरही शहरातील खड्ड्यांचे फोटो आणि व्हिडीओ मोठ्या प्रमाणात व्हायरल होत असून, प्रशासनाच्या कारभारावर नागरिकांकडून नाराजी व्यक्त केली जात आहे.
पावसाळा सुरू होण्यापूर्वी रस्त्यांची डागडुजी आणि खड्डे बुजविण्याची कामे होणे अपेक्षित असताना अनेक ठिकाणी अद्यापही परिस्थिती जैसे थे आहे. काही ठिकाणी खड्डे बुजविण्यात आले असले तरी निकृष्ट कामामुळे पुन्हा रस्त्याची दुरवस्था झाल्याची नागरिकांची तक्रार आहे.
“खड्डे बुजवा, नाहीतर अपघाताची जबाबदारी कोण घेणार?” असा थेट सवाल आता बुलढाण्याची पब्लिक प्रशासनाला विचारत आहे. नागरिकांच्या वाढत्या संतापाची दखल घेऊन संबंधित विभागाने तातडीने शहरातील रस्त्यांची पाहणी करून धोकादायक खड्डे बुजवावेत, अशी मागणी जोर धरत आहे.
बुलढाणेकरांचा सवाल एकच—रस्ते कधी सुधारणार आणि खड्ड्यांचा वनवास कधी संपणार?
जांभरुण रोडवरील भला मोठा खड्डा; अपघाताची भीती, नागरिक संतप्त
शहरातील बसस्थानकाच्या मागील बाजूस असलेल्या जांभरुण रोडवर डॉ. वानेरे हॉस्पिटलसमोर भला मोठा खड्डा पडल्याने वाहनधारकांसह नागरिकांच्या सुरक्षेचा प्रश्न निर्माण झाला आहे. या खड्ड्यामुळे दुचाकी आणि चारचाकी वाहनांचा अपघात होण्याची शक्यता असून, नगरपालिकेने तातडीने उपाययोजना करावी, अशी मागणी स्थानिक नागरिकांकडून होत आहे.
जांभरुण रोड परिसरात मोठ्या प्रमाणात हॉस्पिटल्स आणि मेडिकल दुकाने असल्याने या रस्त्यावर दिवसभर मोठी वर्दळ असते. त्यातच शालेय विद्यार्थ्यांचीही या मार्गावरून दररोज ये-जा सुरू असते. त्यामुळे रस्त्यावरील खड्डा चुकविताना वाहनचालक तसेच विद्यार्थ्यांना मोठी कसरत करावी लागत आहे.
या मार्गावर मोठ्या प्रमाणात वाळूची वाहतूक होत असल्याने रस्त्याची अवस्था आणखी खराब झाल्याचे स्थानिक नागरिकांचे म्हणणे आहे. रस्त्यावरील खड्डा आणि खराब झालेल्या मार्गामुळे भविष्यात गंभीर अपघात होण्याची शक्यता नाकारता येत नाही.
नगरपालिकेने वेळीच या समस्येकडे लक्ष देऊन खड्डा बुजविण्यासह रस्त्याची दुरुस्ती करावी. अन्यथा एखादा अपघात घडल्यानंतर त्याची जबाबदारी कोणाची, असा सवाल परिसरातील नागरिकांनी उपस्थित केला आहे.
