शिक्षक भारतीचे नेते कपील पाटील, अशोक बेलसरे, सुभाष मोरे यांची प्रमुख उपस्थिती
अमरावती : अमरावती विभाग शिक्षक मतदारसंघाच्या निवडणुकीसाठी शिक्षक भारतीचे अधिकृत उमेदवार सुरेश देवकर सोमवार, ५ ऑक्टोबर रोजी आपला उमेदवारी अर्ज दाखल करणार आहेत. दुपारी १ वाजता अमरावती येथील मुक्ताई पॅलेस, रहाटगाव रिंग रोड येथे पदाधिकारी, कार्यकर्ते आणि शिक्षकांच्या उपस्थितीत हा कार्यक्रम होणार आहे.
उमेदवारी अर्ज दाखल करण्याच्या कार्यक्रमाला शिक्षक भारतीचे नेते तथा माजी आमदार कपील पाटील, अध्यक्ष अशोक बेलसरे आणि कार्याध्यक्ष सुभाष मोरे यांची प्रमुख उपस्थिती राहणार आहे. त्यामुळे या कार्यक्रमाला शिक्षक भारतीचे पदाधिकारी, सदस्य, कार्यकर्ते तसेच विभागातील शिक्षकांची मोठी उपस्थिती राहण्याची शक्यता आहे.
अमरावती विभागातील शिक्षकांच्या विविध प्रश्नांना सातत्याने व्यासपीठ उपलब्ध करून देत त्यासाठी आवाज उठविणारे सुरेश देवकर आता शिक्षक मतदारसंघाच्या निवडणुकीच्या रिंगणात उतरले आहेत. शिक्षण क्षेत्रातील प्रलंबित प्रश्न, शिक्षकांचे हक्क आणि सन्मान यासाठी संघटनेच्या माध्यमातून सातत्याने संघर्ष करण्याची भूमिका शिक्षक भारतीने घेतली आहे.
या पार्श्वभूमीवर सुरेश देवकर यांच्या उमेदवारीकडे शिक्षक भारतीकडून महत्त्वपूर्ण पाऊल म्हणून पाहिले जात आहे. त्यांच्या उमेदवारी अर्ज दाखल करण्याच्या कार्यक्रमासाठी अमरावती विभागातील सर्व पदाधिकारी, सदस्य आणि शिक्षकांनी मोठ्या संख्येने उपस्थित राहावे, असे आवाहन शिक्षक भारतीच्या वतीने करण्यात आले आहे.
