शहरातील सर्व वयोगटातील कलाकारांना सहभागाचे आवाहन; उत्कृष्ट रीलला ‘बुलडाणा अर्बन बेस्ट रील अवॉर्ड’
बुलडाणा : गणेशोत्सव हा खऱ्या अर्थाने लोकोत्सव व्हावा, या उद्देशाने दरवर्षी विविध सामाजिक, सांस्कृतिक आणि मनोरंजनात्मक उपक्रमांचे आयोजन करणाऱ्या बुलडाणा अर्बन कर्मचारी गणेशोत्सव मंडळाचे यंदा रौप्य महोत्सवी म्हणजेच २५ वे वर्ष आहे. या विशेष वर्षाचे औचित्य साधून मंडळाच्या वतीने बुलडाणा शहर व परिसरातील सर्व वयोगटातील नागरिकांसाठी ‘व्हायरल मिमिक्री रील स्पर्धे’चे आयोजन करण्यात आले आहे.
ही स्पर्धा १४ ते १९ सप्टेंबर २०२६ या कालावधीत होणार आहे. स्पर्धकांनी इन्स्टाग्राम किंवा फेसबुकवर रील तयार करून ती मंडळाच्या अधिकृत ग्रुपवर पाठवायची आहे. उत्कृष्ट रीलची निवड करून संबंधित स्पर्धकाला ‘बुलडाणा अर्बन बेस्ट रील अवॉर्ड’ देऊन गौरविण्यात येणार आहे.
एका स्पर्धकाला दोन रील्सचीच संधी
स्पर्धेसाठी रीलची कमाल मर्यादा एक मिनिटाची राहणार आहे. प्रत्येक स्पर्धकाला जास्तीत जास्त दोन रील्स सादर करता येतील. दोनपेक्षा अधिक रील्स पाठविणाऱ्या स्पर्धकाचा सहभाग रद्द करण्यात येईल. स्पर्धेत सहभागी होण्यासाठी स्पर्धक हा बुलडाणा शहर किंवा परिसरातील रहिवासी असणे आवश्यक आहे.
रीलमध्ये अश्लीलता, राजकीय किंवा उच्चपदस्थ व्यक्तींची बदनामी, महापुरुषांचा अवमान, महिलांविषयी आक्षेपार्ह मजकूर, धार्मिक भावना दुखावणारे अथवा कायद्याचे उल्लंघन करणारे कोणतेही घटक असता कामा नयेत. नियमांचे उल्लंघन करणारी रील स्पर्धेतून बाद करण्यात येईल.
वेगळ्या कलागुणांना विशेष प्राधान्य
केवळ गाणे किंवा डान्स यापेक्षा स्वतःच्या कलागुणांवर आधारित काही वेगळे, कल्पक आणि नावीन्यपूर्ण सादरीकरण करणाऱ्या स्पर्धकांना विशेष प्राधान्य देण्यात येणार आहे. रीलमध्ये इतर सहकाऱ्यांचा समावेश करता येणार असला, तरी पारितोषिकाची रक्कम अथवा सन्मान केवळ नोंदणी केलेल्या मुख्य स्पर्धकाला दिला जाणार आहे. स्पर्धेतील पंचांचा निर्णय अंतिम राहणार आहे.
२० सप्टेंबरला उपस्थिती अनिवार्य
बेस्ट रील्सच्या निवडीसाठी सर्व स्पर्धकांनी २० सप्टेंबर २०२६ रोजी बुलडाणा अर्बन मुख्य शाखेसमोरील गोवर्धन इमारतीच्या हॉलमध्ये उपस्थित राहणे अनिवार्य आहे.
स्पर्धेत नावनोंदणी तसेच अधिक माहितीसाठी अभिजीत सवडकर (९०११०२३४२८), सुधाकर मानवतकर (७२७६९७५१४३), सुमेध सावदेकर (९५५२४५२८८९) किंवा गजानन राठोड (९११२७४०७८९) यांच्याशी संपर्क साधावा, असे आवाहन आयोजकांनी केले आहे.
बुलडाणा शहरातील जास्तीत जास्त कलाकार, हौशी कलावंत आणि नागरिकांनी या आगळ्यावेगळ्या स्पर्धेत सहभागी होऊन आपल्या कलागुणांना व्यासपीठ मिळवून द्यावे, असे आवाहन बुलडाणा अर्बन कर्मचारी गणेशोत्सव मंडळाच्या वतीने करण्यात आले आहे.
प्रसंगावधान दाखवत परिचारिका पौर्णिमा जाधव यांनी वाचविले नवजात बाळाचे प्राण
