बुलडाणा : शहराला लागून असलेल्या मौजे माळविहीर येथील विश्वास नगर भाग परिसरातील पडलेल्या नालीची तातडीने दुरुस्ती करण्यात यावी, या मागणीसाठी शिवसेनेचे शाखाप्रमुख आकाश विलास चौधरी यांनी गुरुवार, दि. ३ सप्टेंबर २०२६ रोजी पंचायत समिती कार्यालय, बुलडाणा समोर आमरण उपोषण सुरू करण्याचा इशारा दिला आहे.
चौधरी यांनी दिलेल्या निवेदनानुसार, विश्वास नगरमधील नाली दुरुस्तीच्या मागणीसाठी यापूर्वी ३ ऑगस्ट २०२६ रोजी आमरण उपोषणाचा अर्ज पंचायत समिती प्रशासनाकडे सादर करण्यात आला होता. त्यावेळी गटविकास अधिकारी यांच्या दालनात ग्रामपंचायत अधिकारी तथा प्रशासक यांनी लेखी आश्वासन देऊन उपोषण मागे घेण्याची विनंती केली होती. त्यानंतर संबंधित लेखी आश्वासनावर विश्वास ठेवून उपोषण मागे घेण्यात आले.
मात्र, आश्वासन देऊनही अद्याप नाली दुरुस्तीचे कोणतेही काम सुरू करण्यात आले नसल्याचा आरोप चौधरी यांनी केला आहे. त्यामुळे नाईलाजास्तव दि. ३ सप्टेंबरपासून पंचायत समिती कार्यालय बुलडाणा समोर आमरण उपोषण करण्याचा निर्णय घेतल्याचे त्यांनी निवेदनात नमूद केले आहे.
जोपर्यंत नाली दुरुस्तीचे काम प्रत्यक्ष सुरू होत नाही, तोपर्यंत उपोषण मागे घेणार नसल्याचे आकाश चौधरी यांनी स्पष्ट केले आहे. उपोषणादरम्यान त्यांच्या आरोग्यास कोणतीही हानी झाल्यास संबंधित अधिकारी जबाबदार राहतील, असा इशाराही निवेदनातून देण्यात आला आहे.
या निवेदनाच्या प्रती जिल्हाधिकारी, मुख्य कार्यकारी अधिकारी जिल्हा परिषद, उपमुख्य कार्यकारी अधिकारी (पंचायत), जिल्हा परिषद, बुलडाणा शहर पोलीस स्टेशन तसेच ग्रामपंचायत अधिकारी व प्रशासक, माळविहीर यांच्यासह संबंधित विभागांना देण्यात आल्या आहेत.
