चिखली : बहुजन साहित्य संघ चिखलीच्या वतीने आयोजित करण्यात आलेले ७ वे राज्यस्तरीय बहुजन साहित्य संमेलन २३ ऑगस्ट २०२६ रोजी संत नगरी पंढरपूर येथे उत्साहात संपन्न झाले. छत्रपती शाहू महाराज साहित्य नगरी, पद्मनाभ पॅलेस सभागृह, सिंगन नगर, पंढरपूर, जि. सोलापूर येथे झालेल्या या संमेलनात विविध साहित्यिक, कवी आणि मान्यवरांची उपस्थिती होती.
या संमेलनात साखळी बुद्रुक येथील निमंत्रित कवी व कथाकार रमेश खंडारे यांनी वडार समाजाच्या वर्तमान सामाजिक व आर्थिक परिस्थितीवर आधारित ‘आम्ही वडार वडार’ या कवितेचे प्रभावी सादरीकरण केले.
पोटापाण्यासाठी भटकंती करणारा वडार समाज आजही आर्थिकदृष्ट्या सक्षम झालेला नाही. शहरांतील काही अपवादात्मक कुटुंबे वगळता ग्रामीण भागातील बहुतांश वडार कुटुंबांची परिस्थिती हलाखीची आहे. देशाला स्वातंत्र्य मिळून अनेक दशके उलटली, तरी तळागाळातील आदिवासी व भटक्या समाजाच्या झोपडीपर्यंत स्वातंत्र्याचा प्रकाश पोहोचलेला नाही, या वास्तवावर कवितेतून भाष्य करण्यात आले.
रमेश खंडारे यांच्या प्रभावी आणि ओजस्वी कविता सादरीकरणाला उपस्थित श्रोत्यांकडून उत्स्फूर्त प्रतिसाद मिळाला. त्यांच्या या उत्कृष्ट सादरीकरणाबद्दल संमेलनाच्या वतीने त्यांचा सन्मानचिन्ह, सन्मानपत्र, शाल आणि हार देऊन यथोचित सत्कार करण्यात आला.
यावेळी संमेलनाचे अध्यक्ष नागेशजी सिघन, बहुजन साहित्य संघाचे अध्यक्ष अॅड. डॉ. विजयकुमार कस्तुरे, उपाध्यक्ष डॉ. बबनराव महामुने, सचिव डॉ. डी. व्ही. खरात यांच्यासह साहित्यप्रेमी आणि रसिक मोठ्या संख्येने उपस्थित होते.
वंचित व भटक्या समाजाच्या प्रश्नांना साहित्य आणि कवितेच्या माध्यमातून प्रभावीपणे मांडणाऱ्या कवी रमेश खंडारे यांच्या सन्मानाबद्दल साहित्य क्षेत्रातून त्यांचे कौतुक होत आहे
