दोष कंपन्यांचा, शिक्षा मात्र नागरिकांना; गुणवत्तेच्या चौकशीसह दोषपूर्ण प्लेट विनामूल्य बदलण्याची मागणी
राज्यात वाहन सुरक्षेच्या नावाखाली सक्तीने बसविण्यात आलेल्या एचएसआरपी (हाय सिक्युरिटी रजिस्ट्रेशन प्लेट) नंबर प्लेटच्या गुणवत्तेबाबत गंभीर प्रश्नचिन्ह निर्माण झाले आहे. राज्यभरातून प्लेट निखळणे, रंग उडणे, रेट्रो-रिफ्लेक्टिव्ह कोटिंग खराब होणे तसेच निकृष्ट दर्जाच्या रिव्हेटमुळे नंबर प्लेट रस्त्यावर पडण्याच्या तक्रारी मोठ्या प्रमाणावर समोर येत आहेत. मात्र या दोषांचा आर्थिक फटका सामान्य वाहनधारकांनाच बसत असल्याने तीव्र नाराजी व्यक्त होत आहे.
वाहनांची सुरक्षा आणि बनावट नंबर प्लेटला आळा घालण्यासाठी एचएसआरपी योजना राबविण्यात आली. मात्र अनेक वाहनधारकांच्या म्हणण्यानुसार, बसविण्यात आलेल्या प्लेट काही महिन्यांतच निकामी होत आहेत. पूर्वी वापरले जाणारे मजबूत बोल्ट काढून अॅल्युमिनियमचे रिव्हेट बसविण्यात आल्याने प्लेट सहज निखळून पडत असल्याचे अनेकांनी सांगितले आहे.
प्लेट हरवल्यानंतर वाहनधारकांना पोलिसांत तक्रार नोंदविणे, ऑनलाइन अर्ज करणे, अपॉइंटमेंट घेणे आणि नवीन प्लेटसाठी पुन्हा शुल्क भरणे अशी संपूर्ण प्रक्रिया पार पाडावी लागत आहे. विशेष म्हणजे, उत्पादनातील दोष किंवा निकृष्ट दर्जाच्या साहित्यामुळे प्लेट खराब झाली असतानाही संबंधित यंत्रणा जबाबदारी स्वीकारत नसल्याचा आरोप केला जात आहे.
याहून गंभीर बाब म्हणजे अनेक वाहनांच्या नंबर प्लेटवरील रेट्रो-रिफ्लेक्टिव्ह कोटिंग अल्पावधीतच खराब होत असल्याने रात्री नंबर स्पष्ट दिसत नाही. त्यामुळे वाहतूक सुरक्षिततेवरही प्रश्नचिन्ह निर्माण झाले आहे. वाहन सुरक्षा वाढविण्याच्या उद्देशाने सुरू करण्यात आलेली योजना आता उलट सुरक्षिततेलाच धोका निर्माण करत असल्याची टीका वाहनधारकांकडून होत आहे.
दरम्यान, एचएसआरपी नंबर प्लेटच्या गुणवत्तेची उच्चस्तरीय चौकशी करण्यात यावी, दोषपूर्ण प्लेट विनाशुल्क बदलून द्याव्यात तसेच निकृष्ट दर्जाचे साहित्य वापरणाऱ्या कंपन्यांवर कठोर कारवाई करावी, अशी जोरदार मागणी वाहनधारकांकडून होत आहे.
राज्यात २२ जिल्हा परिषद निवडणुकांचा मार्ग मोकळा; डिसेंबरमध्ये बिगुल वाजण्याची शक्यता
बुलढाण्यात हवामान अभ्यासक पंजाब डख यांचे रविवारी जाहीर व्याख्यान
‘निक्षय मित्र’ बनून टीबी रुग्ण दत्तक; टीबीमुक्त बुलढाणासाठी सीईओ गुलाब खरात यांचा पुढाकार
