केंद्रीय शिक्षणमंत्री धर्मेंद्र प्रधान यांच्या राजीनाम्याची बुलढाण्यात मागणी
बुलढाणा (प्रतिनिधी) : नीट पेपरफुटी प्रकरण आणि दिल्लीतील विद्यार्थ्यांवर झालेल्या कथित लाठीहल्ल्याच्या निषेधार्थ शिवसेना (उद्धव बाळासाहेब ठाकरे) पक्षाच्या वतीने गुरुवारी बुलढाण्यात केंद्र सरकारविरोधात डफडे बजाव आंदोलन करण्यात आले. जयस्तंभ चौकात झालेल्या या आंदोलनातून केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करण्यात आली.
शिवसेना जिल्हाप्रमुख जालिंदर बुधवत आणि पक्षाच्या राज्य प्रवक्त्या जयश्री शेळके यांच्या नेतृत्वाखाली हे आंदोलन पार पडले. आंदोलनादरम्यान शिवसैनिकांनी डफडे वाजवत केंद्र सरकारच्या धोरणांविरोधात घोषणाबाजी केली. नीट पेपरफुटी प्रकरणातील जबाबदारी निश्चित करून केंद्रीय शिक्षणमंत्री धर्मेंद्र प्रधान यांनी तातडीने राजीनामा द्यावा, अशी मागणी आंदोलनकर्त्यांनी केली.
यावेळी विद्यार्थ्यांवरील लाठीहल्ल्याचा निषेध व्यक्त करत शिक्षण व्यवस्थेतील कथित भ्रष्टाचाराविरोधात संताप व्यक्त करण्यात आला. तसेच विद्यार्थ्यांच्या भविष्याशी तडजोड करणाऱ्या घटनांवर केंद्र सरकारने ठोस भूमिका घ्यावी, अशी मागणीही करण्यात आली. आंदोलनात डी. एस. लहाने, सुमित सरदार, युवा सेना जिल्हाप्रमुख नंदू कऱ्हाडे यांच्यासह शिवसेनेचे पदाधिकारी, शिवसैनिक आणि कार्यकर्ते मोठ्या संख्येने सहभागी झाले.
“विद्यार्थ्यांचा आवाज दडपणारी सत्ता टिकणार नाही” : विश्वदीप पडोळ
विद्यार्थ्यांवरील लाठीहल्ल्याच्या निषेधार्थ २३ जुलैला बुलढाण्यात मूक रॅली
सामाजिक उपक्रमांनी शिवाजीराव बापू देशमुख यांचा वाढदिवस उत्साहात साजरा
