बुलडाणा- आठवडी बाजारातील रेड मेटल दुकानावर काम करणार्‍या येथील तरुणाने काम सोडण्यापूर्वी भांड्यांच्या दुकानदाराच्या नावावर फायनान्सवर घेतलेल्या आयफोन मोबाइलचे पैसे भरले. मात्र, तुझ्याकडे रक्कम बाकी असल्याचे सांगत घरी जावून धमक्या दिल्याने तरुणाने घराजवळील झाडाला गळफास घेऊन आत्महत्या केली. १३ नोव्हेंबरच्या पहाटे पाच वाजता ही घटना उघडकीस आली. मुलाने लिहून ठेवलेल्या सुसाइड नोट नुसार दुकानमालकासह दोन जणांवर धाड पोलिसांनी गुन्हा दाखल केला आहे. हर्षल गजानन देवकर (वय १९) असे मृत युवकाचे नाव आहे.
नितीन जाधव व अजय जाधव (रा. बुलढाणा) या दोघांनी धमक्या दिल्याने हर्षलने आपली जीवनयात्रा संपविली. हर्षल हा नितीन जाधव याच्या मालकीच्या रेड मेटल या भांड्याच्या दुकानावर कामाला होता. बीएससी प्रथम वर्षाला तो बुलढाण्यातील जिजामाता महाविद्यालयात प्रथम वर्षाला शिक्षण घेत होता. शिक्षणाला हातभार लागावा म्हणून तो नितीन जाधव व अजय जाधवच्या रेड मेटल या भांड्याच्या दुकानामध्ये काम करीत होता. बुलढाण्यातच तो खोली भाड्याने करून राहात होता. घटनेच्या तीन दिवसांपूर्वी तो धामणगाव येथे आला. दुकानमालकाच्या नावाने बजाज फायनान्सच्या कार्डवर त्याने नवीन आयफोन मोबाइल खरेदी केला होता.
१२ नोव्हेंबरच्या रात्री ११ वाजता दुकानमालक नितीन जाधव व अन्य एक जण हर्षलच्या घरी गेले. तु दुकानावर काम येत नाही, तुझ्याकडे आमच्या नावाने घेतलेल्या मोबाइलचे पैसे बाकी आहे असे म्हणू लागले. त्यावेळी हर्षलने दुकानाचे काम सोडण्यापूर्वीच मोबाइलचे पूर्ण पैसे दिले आहे. विनाकारण पैशांचा आळ घेऊ नका, असे सांगितले. त्यावेळी आरोपींनी आता तर मोबाइल घेऊन जात आहे, पुढच्या वेळी तुला जीवाने मारून टाकेन, अशा धमक्या दिल्या. त्याच्या आई, वडिलांनी दुकानदारास समजावून सांगत उद्या पैसे घेऊन येतो, असे म्हटले. त्यानंतर ते झोपी गेले. तर हर्षल हा काका रमेश देवकर यांच्या घरी झोपण्यासाठी गेला होता. १३ नोव्हेंबरच्या पहाटे पाच वाजता तो झाडाला गळफास घेतलेल्या अवस्थेत आढळून आला. आत्महत्येपूर्वी लिहिलेल्या चिठ्ठीवरून दुकानमालकांविरुद्ध आत्महत्येस प्रवृत्त केल्याचा गुन्हा दाखल करण्यात आला.
