Jarange lashes out at the government over the cancellation of the Kunbi certificate; warns, “I will make life miserable for the government and cause the defeat of candidates in many constituencies.”
मराठा आरक्षण आंदोलनाचे नेते मनोज जरांगे पाटील यांनी कुणबी प्रमाणपत्र रद्द करण्याच्या मुद्द्यावरून राज्य सरकारवर जोरदार हल्लाबोल करत सरकारवर गंभीर आरोप केले. सरकार दबावाखाली काम करत असून, जाणीवपूर्वक आणि खोटारडेपणाने कुणबी प्रमाणपत्रे रद्द केली जात असल्याचा आरोप त्यांनी केला. या निर्णयामुळे मराठा समाजामध्ये मोठा असंतोष निर्माण झाला असून, सरकारने या विषयात पारदर्शक भूमिका घ्यावी, अशी मागणीही त्यांनी केली.
प्रसारमाध्यमांशी संवाद साधताना जरांगे पाटील यांनी मंत्री राधाकृष्ण विखे पाटील यांच्यावरही निशाणा साधला. तसेच स्वतःला मराठा समाजाचे नेते म्हणवणारे शिंदे सेनेतील आणि भाजपातील नेते मराठा समाजावर अन्याय होत असताना मौन का बाळगत आहेत, असा सवाल त्यांनी उपस्थित केला. समाजाच्या प्रश्नांवर बोलण्याऐवजी सत्तेच्या दबावाखाली गप्प बसण्याची भूमिका त्यांनी घेतल्याचा आरोपही जरांगेंनी केला.
जरांगे म्हणाले, “मी सरकारला अनेक वेळा सांगितले होते की, हा खेळ करू नका. हे आपल्या समाजातीलच लोक आहेत. बावनकुळे यांच्याबाबतही मी अनेकदा चांगले बोललो. मात्र, त्यानंतर अधिकाऱ्यांना फोन करून तात्पुरत्या नोंदी घ्या आणि नंतर ती प्रमाणपत्रे रद्द करा, अशा सूचना देण्यात आल्या. त्यामुळे हजारो कुटुंबांवर अन्याय झाला आहे.”
सरकारच्या या भूमिकेमुळे मराठा समाजाची फसवणूक झाल्याचा आरोप करत त्यांनी आगामी काळात आंदोलन अधिक तीव्र करण्याचा इशारा दिला. “आता मी सरकारला बेजार करेल. सरकारला जनतेसमोर उत्तर द्यावे लागेल. आगामी निवडणुकांमध्ये त्यांच्या अनेक जागा पाडेल. समाजाशी केलेला विश्वासघात जनता विसरणार नाही,” असे ते म्हणाले.
मराठा आरक्षण आणि कुणबी प्रमाणपत्रांच्या प्रश्नावरून राज्यातील राजकीय वातावरण पुन्हा तापण्याची शक्यता व्यक्त केली जात आहे. सरकारच्या निर्णयाविरोधात मराठा समाजात नाराजी वाढत असून, या प्रकरणात सरकारची पुढील भूमिका काय असेल, याकडे सर्वांचे लक्ष लागले आहे. दरम्यान, सरकारकडून अद्याप जरांगे यांनी केलेल्या आरोपांवर अधिकृत प्रतिक्रिया आलेली नाही. त्यामुळे या मुद्द्यावर पुढील काही दिवसांत राजकीय आरोप-प्रत्यारोप अधिक तीव्र होण्याची शक्यता वर्तवली जात आहे.
‘मला एकटा पाडण्यासाठी सरकारचा नियोजित कट’; जरांगेंचा गंभीर आरोप
मराठा आरक्षण आंदोलनाचे नेते मनोज जरांगे पाटील यांनी राज्य सरकारवर गंभीर आरोप करत, मागील दोन दिवसांपासून सरकारकडून आपल्याविरोधात नियोजित कट रचला जात असल्याचा दावा केला.
“कालपासून राज्यात सरकारकडून एक कट शिजवला गेला. मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या मंत्र्यांकडून हा कट रचला जात आहे. कुणबी नोंदी द्यायच्या त्यांनीच आणि नंतर ती प्रमाणपत्रे रद्दही त्यांनीच करायची, असा डाव आखण्यात आला,” असा आरोप जरांगे यांनी केला. पुढे बोलताना ते म्हणाले, “मला समाजापासून वेगळे पाडण्यासाठी आणि एकटा पाडण्यासाठी सरकारने जाणूनबुजून हा कट रचला आहे. हा संपूर्ण कट पूर्वनियोजित आणि ठरवून करण्यात आला आहे.”
या घडामोडींवर आपण विविध लोकप्रतिनिधींशी चर्चा केल्याचे सांगत, पुढील आंदोलनाची दिशा लवकरच जाहीर केली जाईल, असेही त्यांनी स्पष्ट केले. जरांगे यांच्या या आरोपांमुळे मराठा आरक्षणाच्या प्रश्नावरून राज्यातील राजकीय वातावरण पुन्हा तापण्याची शक्यता निर्माण झाली आहे. सरकारकडून मात्र या आरोपांवर अद्याप कोणतीही अधिकृत प्रतिक्रिया देण्यात आलेली नाही.
मंत्र्यांना शिंदेंचा इशारा; तीन मंत्र्यांची नावे चर्चेत, कामगिरी सुधारण्याचे आदेश
