देता की जाता की खाता लाथा

The agitation will continue until the farmers are freed from debt: District Liaison Officer Prof. Narendra Khedekar

शेतकर्‍यांची कर्जमुक्ती होईपर्यंत आंदोलन सुरूच राहील : जिल्हा संपर्कप्रमुख प्रा.नरेंद्र खेडेकर

बातमीविश्व टिम
बुलडाणा
महाराष्ट्र राज्यातील शेतकर्‍यांच्या न्याय्य मागण्यांकडे सरकारचे लक्ष वेधण्यासाठी बुलडाणा जिल्हा शिवसेना (उद्धव बाळासाहेब ठाकरे) पक्षाच्या वतीने २ मे २०२५ रोजी काढण्यात आलेल्या ट्रॅक्टर मोर्चाने जिल्हा मुख्यालय बुलडाणा जाम होऊन गेले होते. यावेळी जिल्हा संपर्कप्रमुख प्राध्यापक नरेंद्र खेडेकर यांनी घणाघाती हल्ला चढवत झोपेच सोंग घेतलेल्या महायुती सरकारला जागा करण्यासाठी हा ट्रॅक्टर मोर्चा असल्याचे सांगितले. देता की जाता की खाता लाथा अशाप्रकारे या आंदोलनाची भविष्यात व्याप्ती वाढवावी लागणार असल्याचे सांगून हा वनवा शेतकर्‍यांच्या कर्जमाफीसाठी राज्यभरात पेटेल आणि शेतकर्‍यांची कर्जमुक्ती होईपर्यंत आंदोलन सुरूच राहील असेही प्रा. नरेंद्र खेडेकर म्हणाले.
जिजामाता प्रेक्षागार परिसरातून या मोर्चाला सुरुवात झाली.

निवडणूक पूर्व काळात दिलेला आश्वासनांचा सरकारला विसर पडल्याने शेतकर्‍यांमध्ये असंतोष आहे.शेतकर्‍यांच्या कर्जमाफीसाठी शिवसेनेने (उबाठा ) या प्रचंड धडक मोर्चातून महायुती सरकारला जाब विचारला. शेकडो ट्रॅक्टर आणि हजारो शेतकरी रस्त्यावर उतरले होते.यावेळी आपल्या मागण्यांचे निवेदन शिवसेना (उबाठा) शिष्ट मंडळाने जिल्हाधिकार्‍यांना रीतसर सुपूर्त केले. तत्पूर्वी जिजामाता प्रेक्षागार येथे पार पडलेल्या सभेत नेत्यांच्या आक्रमक भाषणांनी जोश भरला. यावेळी संबोधित करताना नरेंद्र खेडेकर म्हणाले की, शेतकर्‍यांना निवडणुकीच्या वेळी वेगवेगळी आश्वासने दिली.

मात्र त्या आश्वासनांची पूर्तता झालेली नाही. कर्जमुक्ती हा शेतकर्‍यांचा अधिकार आहे. आम्ही शेतकर्‍यांनी काही चोरी केली नाही. अदानी, अंबानी यांचं हजारो कोटींचं कर्ज माफ होत मग शेतकर्‍यांचं कर्ज माफ करायला सरकारकडे पैसे नाही का? असा सवाल नरेंद्र खेडेकर यांनी केला. जिल्ह्यातील अनेक शेतकर्‍यांना पिक विम्यापासून अपात्र ठरवण्यात आले. काही शेतकर्‍यांना २०० रुपये,१५० रुपये असा विमा मिळाला.

ही शेतकर्‍यांची क्रूर थट्टा या सरकारने चालवली असल्याचे नरेंद्र खेडेकर म्हणाले. आम्ही नकली शिवसैनिक नाही, की सेटलमेंट करणारे नकली शेतकरी नेतेही नाही. शेतकर्‍यांसाठी शिवसेनेने आता वणवा पेटवला आहे. देता की जाता की खाता लाथा? असाही हल्लाबोल खेडेकर यांनी चढवला. केस गळती आणि नख गळती प्रकरणावरून विद्यमान केंद्रीय मंत्री जाधव आणि उपमुख्यमंत्री एकनाथ शिंदे यांच्या आभार सभेवरून खेडेकर यांनी टीकेची झोड उठवली.

शिवसेनेने शेतकर्‍यांच्या कर्जमुक्ती आंदोलनाचा वणवा पेटवला- राज्य प्रवक्त्या अ‍ॅड.जयश्रीताई शेळके

शेतकर्‍यांचा सातबारा कोरा करू म्हणून महायुतीचे सरकार सत्तेत आले. उद्धव ठाकरे मुख्यमंत्री असताना दिलेला शब्द पाळणे म्हणजे काय असते हे त्यांनी दाखवून दिले. त्यांनी मंत्रिमंडळाच्या पहिल्याच बैठकीत शेतकर्‍यांची कर्जमुक्ती केली. मात्र आताचे हे महायुतीचे सरकार अतिशय विश्वासघातकी आहे, असा हल्लाबोल शिवसेनेच्या राज्य प्रवक्त्या जयश्रीताई शेळके यांनी केला. कर्जबुडव्या मोठ्या कंपन्या आणि उद्योगपतींचे कर्ज सरकारने राईट ऑफ केले म्हणजे एक प्रकारे माफच केल. मात्र उन्हातानात परिश्रम करणार्‍या मायबाप शेतकर्‍यांना सरकारने वार्‍यावर सोडले आहे. शेतकर्‍यांच्या आत्महत्या वाढत आहेत. विदर्भ- मराठवाड्यात गतकाळात अडीच हजारावर शेतकर्‍यांनी आत्महत्या केल्या. त्यामुळे या सरकारला लाज वाटली पाहिजे. शिवसेनेने शेतकर्‍यांच्या कर्जमुक्ती आंदोलनाचा वणवा पेटवला आहे. या वणव्यात हे महायुती सरकार भस्मसात होईल असे जयश्रीताई शेळके म्हणाल्या.

महायुतीने सत्ता मिळवली, आता ते सत्तेचे लोणी खाण्यात व्यस्त- आ.खरात

आमदार सिद्धार्थ खरात म्हणाले की, आता शेतकरी जागा झालेला आहे. शिवसेना हा एकमेव पक्ष शेतकर्‍यांच्या पाठीशी असल्याचे ते म्हणाले. महायुतीतल्या एकतरी आमदाराने,नेत्याने शेतकर्‍यांच्या प्रश्नावर आवाज उठवला आहे का?असा सवाल त्यांनी केला. खोटी आश्वासने देऊन महायुतीने सत्ता मिळवली, आता ते सत्तेचे लोणी खाण्यात व्यस्त असून महायुतीचे हे सरकार फसवे आहे असेही आ.खरात म्हणाले. नाफेड ची खरेदी केंद्र बंद आहेत. अजूनही सोयाबीन शेतकर्‍यांच्या घरात पडून आहे. आता झोपेच सोंग घेणार्‍या सरकारच्या विरोधात शिवसेनेचे भगव वादळ पेटून उठले आहे. सूत्रसंचालन युवासेना जिल्हाप्रमुख नंदू कर्‍हाडे व तालुकाप्रमुख लखन गाडेकर यांनी केले.

यावेळी जिल्हा संपर्कप्रमुख प्रा.नरेंद्र खेडेकर,आमदार सिद्धार्थ खरात, शिवसेना प्रवक्ता जयश्रीताई शेळके, जिल्हाप्रमुख,सहसंपर्कप्रमुख महिला आघाडी जिल्हा संघटक डी एस लहाने, जिल्हा समन्वयक संदिप शेळके युवसेना जिल्हाप्रमुख नंदु कर्‍हाडे, उपजिल्हाप्रमुख आशिष रहाटे,तालुका प्रमुख लखन गाडेकर,अशोक गव्हाणे शिवसेना, युवसेना महिला आघाडी, किसान सेनेचेपदाधिकारी व कार्यकर्ते व हजारो शेतकर्‍यांची उपस्थिती होती.